دا شعب فقري

شعر: أحمد فؤاد نجم

نظرا لأن النعمة فاقت حدها

ولإننا مش قدها

ولأن فعلا إنجازاتك

فوق طاقتنا نعدها

ولأننا غرقنا فى جمايل

مستحيل حنردها

نستحلفك ....... نسترحمك

نستعطفك .......نستكرمك

ترحمنا من طلعة جنابك حبتين

عايزين نجرب خلقة تانية ولو يومين

أسمع بقى

إحنا زهقنا من النعيم

ونفسنا فى يومين شقى

عايزين نجرب الاضطهاد

ونعوم ونغرق فى الفساد

بينى وبينك حضرتك

دا شعب فقرى مايستحقش جنتك

أنا عارفه شعب ما ينفعوش

إلا شارون وبلير وبوش

عايز يجرب الإمتهان

ويعيش عميل للأمريكان

بيمد "غازه" لإسرائيل

ويومين كمان ويمد نيل

أهو يعنى نشرب مية واحدة

ندوب فى بعض

ماء وماء وماء

ونفض سيرة الانتماء

وبلاها نعرة وطنطنة

تبقى البلاد "مستوطنة "

(متسلطنة بالسرطنة)

إية اللى خدناه م الكرامة والإباء

حبة خطب وكلام...كلام

إحنا راهنا على النظام

ورضينا بخيار السلام

(بخيار)

حنسد عين الشمس بيه

علشان مايطلعش النهار

ويطلع لمين؟

حبة معارضة مغرضين؟

وحسب بيان السلطة شلة مأجورين؟

ياعم فضك سيرة

وارضى بقسمتك

دا شعب مش فاهم أكيد

يالا أطرده من رحمتك

وإن كنت غاوى الحكم

خليك مطرحك

هاغطس واقب وأعود

بشعب يريحك

راضى وعمره مايجرحك

أخرس وما يسمعش

وأعميلك عنيه

مش كل قرش يبص

فيه

مايقولش لأه / وفين / وليه

يضرب ينفض فى السليم

وعلى الصراط المستقيم

كل اللى يعرف ينطقه

عاش الزعيم

يحيا الزعيم